【曾智华专栏】我错！人人问候老姚！

今日这篇稿，有两个主题！

第一个系——我认错！

错就要认，打就企定。小弟错在乜？错在指马会送出「小家礼券」，只得五日换领期。原来呢，乃我眼睛睇得手机多，日渐老花兼视力变弱，睇唔清楚咁细的字，为2025年期满当2024年，今次我要Say——Sorry。

另一单乃发生在周三快活谷之夜，不少睇咗姚厩发畀马房旗下马主例汤贴士者，怒火中烧，当中几位乃小弟老友，简直M声震天。

发生乜事？皆因赛前姚本辉照例「醒」贴士畀马主，内容：各位马主好友，今晚出马七匹，第七场机会压一，其他第三及第五场有P，祝大家好运！

好运？结果老姚搞到马主个个行衰运，输到PK！

首先，佢实牙实齿话机会压一的「极速奇兵」，当然个个瞓身下注，打到变全场大热。结果？入直路时已开始纷纷顶姚本辉头槌，觉得被跣镬劲，因只马根本无力炼，脚软软下跑第八，输三个马位，呢铺真真尸横遍野！

不过，同一晚，姚厩就爆出近三十倍的「生生胜利」及八倍的「得意佳作」，孖宝中正派近2800元。你话压一𠮶只就冇影，你唔提的就爆咗大冷，姚厩马主怎不人人想兜脚伸老姚落大西洋？

好啦，讲返小弟贴士先。

近期本栏符符碌碌，贴士中规中矩，周三话明第八场对碰W，中咗「家乐龙驹」派三倍。

明日「精英碗」二级大赛，让磅，相信马王「加州星球」会只作热身，因冇理由孭重磅搏尽。如此，当然要选「嘉应高升」，新马王，希斯镇仓之宝兼潘顿刻意上从化试闸，诚意一百分，但冇赔率。

首先要拖「级制赛杀手」巴度放弃「美丽第一」而转骑的「骄阳名驹」，劣档，但会好分。加埋「贤者无敌」啦！