【曾智华专栏】外部不确定因素系乜？

近年好多突然出现的形容词，虽则好使好用，但讲出者永远唔会清晰指出系乜意思，只含含糊糊要你估。

最多用的是「挑战」。老友，究竟你系想话失败、唔掂、恶顶、无符、负面、认输、衰咗……定系乜呢？可否清清楚楚讲明呢？

另一为「不可抗力因素」。我一听就想冲口而出讲句——顶你个头槌，乜野叫做不可抗力，有乜咁神秘？

经常有大型活动搞到临尾先唔做，就拿出「不可抗力因素」做挡箭牌。不可抗力，理论上应该是天意的，例如黑雨、十号风球、冧档雪崩……而非纯人为。

抬出「不可抗力因素」为唔玩借口的，永远像要大家猜谜。有乜好猜啊？有乜唔见得光啊？你讲出嚟，香港人自会判断，咁就唔使用阴谋论去睇成件事。

最近大集团华润旗下的华润堂宣布全线执笠唔玩，记者访问负责人李浩然，佢又抬出一句成口泡都解释唔清的「外部不确定因素」。

大佬呀，你嘅「外部」喺边？「内部」又喺边呢？可否讲明一下呢？消费者揸住成叠你的购物券，即将变成废纸，当然有权要求你交代「外部」系乜！

说来，华润堂执笠事件，乃大学MBA（工商管理硕士课程）最佳研究个案。

大家睇到嘅系同做一样生意，万宁及屈臣氏就越开越多，越做越劲，尤其系卖各式成药及补充剂，更是金矿中的金矿，货架上堆到满满，全部百百声起跳，而单睇货品所落的广告，已知利润深不可测，肯定肥过猪！咁环境，点解背景雄厚、历史悠久的华润堂，冇法分一杯羹呢？营运策略上有乜失败呢？

若果做得差而赖「外部」，实在非负责任管理者所为，大丈夫，一人做事一人当！