【曾智华专栏】《老嘢时速》过瘾，睇啦

上周末在家赶稿，枱头电话响起，冇来电显示，通常不会接，但写到闷闷哋，好啦，听听当玩吓。

「老窦呀老窦，救我呀！」

顶佢头锤，一听就知电骗！点解？第一，家中的「排骨仔」只称为父做「肥爸」，另外，刚刚佢在隔篱房打机，呢个骗棍真真断正。

即时小弟百厌星性格突现，本想玩残佢答：「衰仔，你为乜由长沙湾坟场骨灰盅走返出嚟呀？系咪唔够阴司纸用？」又或：「你兜死仔应该锁咗喺青山㖞，又偷走出嚟？快啲报位置同电话，等我揾人捉你！」两个答案在脑中闪出，不过，回心一谂，唉⋯⋯浪费宝贵时间陪骗子玩？嘥料，于是收线！

呢种阿婆、阿嫲、老窦或阿妈救我电话，其实几十年前已有，家中长辈亦中过招，嗱嗱声攞几万元去指定地点「救我」。结果⋯⋯当然系交咗重重学费啦。

呢种「救我呀」电骗，原来四海皆有，今期上映的《老嘢时速》，正是真人真事改编，个案来自编导Josh Margolin祖母的亲身经历。

难得佢又揾到一位九十三岁的阿婆演员担正主角，正是荷里活绿叶王茱施洁比，拍咗七十几年电影，估唔到九十三岁才爆出头来，在烂番茄指数网中分数爆灯。

剧情一如无数受骗长者经历，骗徒扮孙仔，话因撞车伤人被捕，要一万元保释金，必须即过户畀「律师」才放人。

阿婆救孙心切，中招。不过，知道受骗后，剧情进入精彩部分，好过瘾，大家可入院欣赏。

小弟也是长者，对戏内不少场面深有共鸣，例如N种老人病缠身，同辈朋友的际遇⋯⋯

不过，《老嘢时速》最令「老嘢」振奋，为九十三岁仍可大战骗徒而赢得清脆俐落，情节令全院观众乐不可支，大呼正呀，哈哈！