【曾智华专栏】最刺激的总统选战

美国总统选举大战，若单睇香港传媒，极度唔过瘾，因又欠片又欠分析，更欠将所有主角玩到残的栋笃笑！

美国文化，鬼叫你参政？出得嚟行就预咗畀人玩，不是简简单单玩，而系玩到你残！

所以，在美国做政客，面皮必须一丈咁厚，受到雷霆攻击时，心态一定要当佢「唱歌」而唔系「唱衰」。无他，政治现实，你企哪边都会受到一半人狂砌。

美国政情变化之快，令人眼花缭乱。两星期前特朗普被暗杀，立时变成国家英雄Fight Fight Fight，那刻全世界买佢赢拜登两条街。势头咁劲，再捧个副总统候选人万斯出嚟，又即成当红炸子鸡，万众瞩目。

点知民主党轻轻一招「逼」拜登唔玩，将所有资源及支持「队」晒落贺锦丽，哗，成场大战火速反转。贺锦丽最叻系——笑，日日挂在脸上的笑容，对比特朗普又老又串个款，荧幕上出现乜嘢化学效果？香港人点睇唔重要，最重要系有权投票的美国人点睇。

呢场赛事日日在变，搞到连特朗普被行弑这「正因素」也耗尽了。佢同万斯点继续打选战呢？暂时狂特仍沿用「肤色、种族、性别」等不智策略攻对手，但不知不觉间得罪晒全国有色人种及女性。弊在冇乜人可以影响佢价值观，睇嚟佢赢就是赢独特个性，输也会是同一理由。

介绍大家睇Netflix的《绝望者之歌》，万斯自传版电影，四年前上映，冇乜人留意，但四年后今日，关心全球政治走向者一定要睇，因万斯分分钟会变美国总统！佢出身非常坎坷，不单止穷，阿妈更滥交吸毒，在大逆境中竟能杀入一级大学，如今更登上政坛顶峰，发展过程充满戏剧性，睇啦！