【曾智华专栏】人人讲、做、扮⋯…等于⋯…

世间不少事情，皆有一个定律、一个轨迹，若你在当中长期体验，自会明白，变「老是佛」后，就可避过不少劫。

有青春无限者指：「定律是要来打破的！」错唔晒！不过，一条定律经千百次验证，你打破佢一或几次，只似几滴水进入海洋，冇乜代表性，除非能够频频推翻。

投资界尤多定律，其实好易掌握。只不过升市时大多数人会因此得益，参与者基于贪婪及财迷心窍，虽知好景不常，但多会「自己呃自己」——我一定能够爆煲前跳船！

惨在历史纪录上船「享受」的人多，火灾前识跳船者非常少。

近两年大家领略最深的，当然是楼价跌吓深啲，跌吓又深啲。

出奇吗？绝不，一切有迹可寻。原因就是早早炒到过晒龙！政府2004年后的政策「配合」（唔卖地、唔起居屋）、开放内地人到港炒楼及美国零息率，令楼价爆升，搞到政府畀人闹到飞起，于是手忙脚乱「倒转玩」，大量推地加辣招，搞到供求失衡，弊在再遇上疫情、加息及中国经济下沉，加埋加埋，楼市点可唔冧？

睇大势，冇人叻得过诚哥，佢永远掟货快三步，等你醒时，经已被绑。

最近小弟睇到两个Trend好唔妥，将会爆煲，令投资者损手烂脚。

第一个为电动车，尤其内地，你做我又做，斗到烂，斗到残，Profit Margin根本冇乜，所以，以为此乃「未来」大趋势而狂扫电动车公司股票的，请自己执生。

另一为AI，颇有千禧年令人人儍咗的科网潮翻版。大公司固然做，另外也有不少博懵公司，作个贴近AI感觉的公司名，又大炒特炒。

当人人都说AI就是未来，人人都试图走去做，而老千们又扮话识时，等于爆煲边缘了！