【曾智华专栏】绝不手软，过九成交表

公务员有好多种，有啲充满使命感，有的大蛇躺平，有如一个社会缩影，全世界皆如是。

所以，不应一竹篙打一船人，在任何领域，其实乜人都有，要求公平点。

最近不少人议论公务员加薪三巴仙（不少再有增薪点），工会当然话：「影响士气！」

呢句影响士气，好多老友唔明，拉我问：「碌Sir，你做过几十年公务员，一定知乜叫士气，打政府工，几时会有士气？几时会冇士气？点解畀多啲就嘭嘭声有士气？因应经济形势要共渡时艰就话冇士气？呢个讲法，绝少在私人机构听见噃，几『独家』呀吓！」

「唔好问小弟，我乃奇怪动物，打咗三十几年政府工，冇一日会冇士气！总之，好似张建忠名言——有工返就开心，多谢上天畀多日。」

所以，由我答做公务员应该几时冇士气，简直缘木求鱼。

上周四本栏标题——《罗淑佩绝不可手软》，文章一出立即有反应，晨早发言人即回复：「其实交咗申报表的公屋户，已经超过九成！同事非常努力，效果鲜明。」

点解房屋署的同事会追表时士气如此高昂呢？竟可追到九成几户「唔敢唔交表」？佢哋有冇多过三个巴仙人工加？当然有！真想问问「前仆后继」追表追到躺平公屋户冇气唞的公务员。

收完表，只是第一步，下一步当然是抽出滥用户，研究起诉或赶走，无得手软。

至于公屋富户，又是另一类处理个案。听讲风声咁紧，不少富户知道今次政府嚟真，开始唔敢硬碰。

成个走势看，真是排队上楼的穷苦家庭大喜讯，因条龙会缩短好多，不用再住㓥房甚或露宿，这正正是我等纳税人真金白银夹钱起公屋的目标。