【曾智华专栏】游花园高手黄恩诺

新上任水务署署长亮相接受访问，好过瘾！首先，佢外形完全唔似「署长」又或传统高官，头发长长，时款蓝框眼镜。

更好玩，佢善于带记者游花园，弹出啲虚幻名词，讲到加价，话要「人性化」（究竟有人性同冇人性点界定呢？），加幅会「温和」、「循序渐进」，但又冇一个数字，搞到记者堕入五里云雾中，不知如何咬住跟进加唔加？几时加？加几多？

其实水费成三十年冇加，简直难以想像，况且根据黄署长数字，水费平均只占住户开支0.1%至0.2%，若唔加，就难以维持优质且稳定的供水。

仲有，如今年年蚀钱，供水又唔系社会福利，收返成本天公地道，为乜要讲到窒吓窒吓咁，毫无果断性（Decisiveness）？

小弟传媒生涯中，访问无数人，大部分提问完都想笑出来，因十次有九次问完后，我已知对方点答，简直全是Model Answer。

例如你问公务员工会，若加薪不跟足薪酬调查，会点？一定回应：「影响公务员士气。」总之唔理当时社会经济情况如何、民情如何，一讲加薪未到满意水平，就必定——影响士气（士气点量度？）！

又例如公共事业加价，总有议员「逢加必反」，你想揾乜答案，追住佢哋就掂，好快可以收工。今次虽然水费三十年冇加，嗱，你走去访问啲利益团体代表，一样会话：「经济唔好，成本样样升，好难挨⋯⋯最好斗零都唔加。」

仲有更好笑，一讲到加税，经济好时，「为民请命」政客就会话：「经济已经咁好，政府大把地方增加收入，为乜要加？」

好嘞，到经济差时，佢哋又会调转话：「经济咁差，市民已经好苦，为乜火上加油？」

我冇话佢哋啱唔啱，只不过次次访问时，都想「咭」声笑出嚟啫。