【曾智華專欄】校衰口不停

香港的大學界，過去幾年唔知撞咗乜邪，總之就是「校衰口不停」，尤以中文大學與香港大學為甚，難明！

過去大學稱象牙塔，學者、教授畀人感覺（起碼啦）不吃人間煙火，知書識禮，有文化，有學養，凡事論理講邏輯。至於大學管理層，基於自己及大學形象，更是規行矩步，絕不會「𢱑爛面」，辜負公眾期望。

點解要符合公眾期望？因除非私立，大學經費基本來自政府，即納稅人。故此，大學管理層應有問責之心，而非只霸住權霸住位亂咁嚟。

作為一市民，我也是一位港大舊生，絕對有權要求香港大學校務委員會，向公眾開誠布公，老老實實透透明明解釋，究竟在搞乜鬼？為乜校委會主席竟與校長「開大片」，成何體統，知否咁做愧對港人？

在安排副校長人選中，兩人擺明權鬥。其實市民對邊個做邊個位，本來冇興趣，亦冇所謂，但如今搞到亂作一團，校長又點管落去呢？校長冇得管，人事任命又冇話事權，整個校政管理層點運作？

港大校委會主席王沛詩，作為「權鬥」主角，應該立即挺身向全個香港解釋所有部署（包括針對張翔的），有何動機及需要？

我完全唔識王沛詩，只知佢做咗校委會主席後，香港大學的「負面曝光率」離奇地高。

與N位港大舊生講起此事時，無不揼心揼肺，因大家都愛這所蜚聲國際、令香港人引以為傲的最高學府。

搞出一個「副校長爛攤子」，點行下去呢？誰有責任去扶返啱個局，撥亂反正呢？

睇嚟先而教育局局長蔡若蓮，後而港大最高負責人特首李家超，必須行出嚟，話畀全香港市民知，佢哋係點睇，又點拆局？