【曾智華專欄】Same Same Here

《星島日報》及《頭條日報》乃小弟每朝必睇的報紙，雖然潮流大勢是印刷傳媒在沒落中，不過，對我嚟講，有訂網上版，但感覺完全不同，由手感到嗅覺，都毫無親切感。

兩份報章皆充滿N咁多人心血，《星島日報》賣十蚊（土瓜灣不少店只收九蚊），真係抵到無話可說。試想想，今天一條油炸鬼、一個麵包幾啖食完，也是十蚊，但一份報章，由新聞版開始，到娛樂、體育、馬經、副刊、專欄、財經、地產⋯⋯每日冇幾百人努力不能成事。

當然，不同人有不同品味，又或抱有一定政治成見。但作為傳媒人，由零開始，師傅教落就是乜都要睇，包括左中右觀點，若太「偏食」，就會變一隻井底蛙，分析乜都不會有宏觀視野。

兩份報章中，我皆有喜歡的專欄，《頭條日報》就是褚簡寧的《又中又英》。

呢丁老褚，正牌地道香港仔，雖非中國人，但在此長大，長年在接觸最多不同「種類」人物的傳媒界打滾，故早早能講流利廣東話，不止，更精通粗口，隨時十一個字唔斷爆出。粗口精，英文也精，尤其不同地方的俗語，讀佢個欄，學到嘢。

之外，佢更與小弟一樣，對香港有一種切肉不離皮的愛，總之就似一條生猛鹹水魚，只能活在香港這個海，才有存在感。一旦掟咗去英美加澳，即會似被放入淡水湖，慢慢窒息。當然，不同人是不同「魚」，我認識不少朋友，倒十分享受移民生活。

日前讀褚簡寧專欄，又有兩句中正我內心深處，正是凡要離開香港時，就似「A Lump InMy Throat」，必有種悲傷、哽咽感覺，HaveThe Blue。不過，一到回港就即時變「A Whale Of A Time」，非常愉快，如魚得水，立即變返生猛！真想同老褚講句——Same Same Here。