【曾智华专栏】趁你病当然⋯⋯

商场讲乜？当然讲金！凡曰利的地方，就是利字先行，此乃推诸四海皆准的定律。

奇在仍有人睇到地产版新闻：许家印布力径银主盘四亿七千万元沽售。觉得太「离谱」。

点解「离谱」？因做价低过一年前估值八亿八接近一半！

最伤的并非许家印，反正早已一Q清袋，在「里面」长叹，怕且都几难再出嚟。咁边个最伤？正是同样拥有布力径十号班大富豪，突然自己间楼价钱插水，当然MM声。

今次新买家虽然执到平货，但其实佢出价未算最狠，因据报有兴趣扫货的共有几十组人，包括内地大款、本地富豪（当然超级），以及传统大家族，纷纷出价，睇嚟即全部低过四亿七！人哋卖开八亿几，个个博懵，想以一半到三分一价钱执鸡，银主当然唔肯过你，故才拉锯成年。不过，也难怪，商场就是如此运作——趁你病，当然攞你命！

许家印的布力径大宅，初初向新世界发展一手买入时，正值黄金升市期，一买即升，去到五亿几的日子，老许曾豪气对左右手讲：「边个卖楼卖够数，我就送你一间值五亿几嘅布力径豪宅，大家搏啦！」

呢个故事并非街边阿叔或茶记阿婶乱噏乱传，而是一位商界非常有地位者向我讲的。

当然，讲完佢都笑笑口，做个——条友都癫癫哋的表情。

「癫」，正是不少内地巨富在过去二十年坐「白金升降机」之因，班大款出手之狠、之离经叛道，香港的传统富豪只可睇到眼凸而唔敢跟。

所以，唯有私底下互相偷笑：「内地班儍佬咁狼，在香港乱炒地，未见过大蛇屙尿，毫无戒备之心。睇下几时仆直，到时等我哋执货啦！」

讲时似酸葡萄，结果中到开巷！