【曾智華專欄】「川河型駒」會爆冷？

今日標題，小弟擺明是大膽假設，因為「川河型駒」上陣八次，從未入三甲，五次賠率三十倍以上，根本無飛，最熱一次也十五倍。
　　
好嘞，今次再報三班千二米。陣上十一隻出賽，睇今季或最近表現，「加州一寶」、「萬眾開心」、「星耀王者」、「康帝」及「其藝先鋒」，毋須考慮。
　　
剩下來邊線的「快搏」，季初連𡁻兩場後，由六十二分加到七十三分，立即坐馬監，加上已六歲，再出幾場已全無表現，也可放棄。
　　
黎昭昇馬房的「寰宇豐采」，3月份勝出一次千二米，加六分。呢場有機會，但看似仍需回氣，未到時候再出擊。
　　
餘下三匹必成此場三大熱門，即「嘉應喝彩」、「合夥奔馳」及「無限美麗」。
　　
但你知我知，邊會有三隻Do Re Mi咁過終點吖，大熱Q、二重彩或三重彩，老友，你話一季會開幾多次？跑馬跑真真假假，咁簡單，幕後食乜？又有乜好玩？
　　
三匹之中，呂廄的「合夥奔馳」對上兩W，輕風送爽，唔多使用力已贏個幾馬位，如今六十七分，仍未知有幾多在手。呂健威今季擺明想追伍鵬志，鬥練馬師冠軍，決心應冇懷疑，必須尊重，先選取。
　　
伍廄的「嘉應喝彩」又如何？今季出六次，一W一Q兩P一第四，四歲，亦在上升中。同樣，伍鵬志必定用盡一兵一卒，肯定去馬。
　　
蔡廄「無限美麗」跑快活谷，也犀利無比，絕對強項，去年12月開始亮相八場，兩W三Q兩P，次次出，次次博。
　　
要在以上三大熱門中偷雞入Q，邊隻得？我睇只得「川河型駒」，此馬海外千二米賽績特佳，到港後未用過，一直冚手。唯一在3月10日沙田千二米失驚無神剷入第四，僅輸四分三馬位，會否是走光？若是，就有機嘞。