【曾智华专栏】试的与真的

先讲样难忘历史！
　　
话说1975年，小弟及一群贫穷学生赴笈夏威夷，个个来自穷到㶶家庭，故此乜都悭悭悭，人人带个饭煲，餐餐买超市过期菜，捞埋就食，真真口慷慷。
　　
想食好啲点搞？发现新大陆！全世界先进市场多样文化，试食，香港至今仍不太流行，但其时所有夏威夷的超市乜都任试。
　　
就此，我哋呢班「人穷志短」的坏学生，就不停日日走去试食，又肉又肠又海鲜又甜品。终于⋯⋯真羞家，食到畀人针对性驱赶，死未？（呢啲唔系试，系贪心，而家都系。）
　　
此乃毕生难忘的「留学生日子」。
　　
讲返今天。上周杀去潮汕狂食牛肉，饱饱后，离开前，例牌去最大的龙北市场扫货。市场内逼爆，市场外也满布各式专供游客购手信店舖，最多的是卖各式肉丸。
　　
花多眼乱，竞争惨烈，点分？档档都畀你试，试完满意才买。
　　
行呀行，有档门面最大的名「品兴」，巴巴闭，标明市级非物质文化遗产，挂满奖状。
　　
肥老板大大声嗌：「随便试，试过至买！」
　　
我行埋去一睇，未定神，佢已指令女工：「煮两粒丸丸畀老细试试！」
　　
女工遵命，好快从煲中取出一粒墨鱼丸、一粒马鲛鱼丸。试试先，一入口，哗！冇得顶，墨鱼丸内有粒粒鲜墨鱼，好味又有𡁻头，马鲛鱼丸也鲜甜弹牙，真系从未试过如此高水准。
　　
讲多无谓，立即大出血，手打牛丸、墨鱼丸及马鲛丸每样三斤，共九斤，一于拉（用买𩠌车）返香港。
　　
回家刚刚晚饭，即灼啲丸谂住慰妻，等佢赞我识货。点知⋯⋯一口咬落墨鱼丸⋯⋯喂喂，点解冇粒粒鲜墨鱼在内㗎？
　　
唔系唔好食，但同试的，两码子货囉。