【曾智华专栏】睇场波可以去到几尽？

欧洲足球真的好看，不过，今年法甲、意甲、德甲及西甲皆少少被比下去，因英超大放光芒。
　　
欣赏足球，眼见的是场上二十二位球员表演，但资深球迷会睇更高一个层次，研究领队如何调教球队，看排阵，看布局，看策略，同时看佢有乜本事令球队生生不息，栽培出一个又一个新星接棒。
　　
这方面昔日曼联的费爵爷最巴闭，气场劲，够威严，故可弹离对手。
　　
今个世代又如何？再讲恶，一定唔得。出色领队须能阅读所有球员心态，然后当仔咁逐个「凑」。最后就是Team Building，令全队一条心。
　　
喂，好难㗎！因球星是人，必定有自信自尊自傲，甚至自大。简单，若你队波有个C朗在，要佢放弃自我，融入球队不分彼此？过去二十年有边个时期会得？
　　
今届英超好睇到爆，因两大超晒班领队哥迪奥拿（曼城）及高普（利物浦）似在玩马拉松恶斗。英超榜叮当马头，未到5月，难分胜负。
　　
两位领队两个风格，哥迪沉着寡言，高普则热情狂野，皆极具星味，也交出亮丽成绩。
　　
不过很可惜，两雄相遇，下季冇喇。高普决定引退，因体内能量燃烧过劲而耗尽，需要停下来回气，决定季后会拜拜英超。
　　
消息一出，效果系乜？第一，下季哥迪可能变无敌是最寂寞；第二，由现在到季尾，每场利物浦赛事必爆。
　　
爆中之爆为利记最后一场，因场面肯定极度感人，大量死忠粉会喊到收唔到声，几万人必一齐唱《You’ll Never Walk Alone》送别高普。
　　
小弟老友K为忠贞利迷，夸张到早早买咗张三万蚊门券，飞过去入场。
　　
「碌Sir，有今生无来世，破产都要参与呢个历史时刻，连机票、酒店要十万蚊㗎！」