【曾智华专栏】「过江虫」汤普新

近日香港马圈最多人关注的「主角」，并非「软硬鞭」潘顿，也非布文，又或马会主席、总裁等，而是一个「神奇骑师」汤普新。
　　
点解佢咁神奇？第一，渣波到咁款，竟然得到马会大员（边个落决定㗎？）礼聘到港策骑，有人「盲公陈」上身乎？第二，相信应该是「前无古人」，作为「过江龙」，来到香港，竟可以跑足四十七场而一直只能扮演「无影侠」，连一席第四都冇，水蛋到非常得人惊！更难以解释，佢一路骑一路输，但竟然个个赛马日有不少坐骑，上周日又有六匹，与香港骑师榜上的「六哥」巴度看齐，更劲过几位骑功远畀佢优胜的外来骑师，如霍宏声（三匹）、董明朗（五匹）及贺铭年（四匹），难明！
　　
呢条「过江虫」创下历史瘀爆纪录，当然引起多方乱噏界蜂拥品评嘲笑，例如：一、改坏名啦，叫汤普新，即摆明是个畀人「㓥」的普通「新仔」啦；二、有佢在，正呀，场场睇少只！
　　
不过，乜都有人从另一角度睇。例如：「佢渣成咁，未必因骑功有关㗎，大佬，你试吓畀𠮶四十七匹马潘顿跑呀，咪一样输死未天光！」
　　
哈哈，咁反智嘅借口都讲得出。
　　
成日听见人讲：「当你唔尴尬时，尴尬的，就是其他人！」呢个讲法，用在汤普新身上，啱唔啱呢？而佢搞成咁，渣成咁，请佢到港的马会高层，又是否应向所有马圈持份者有个交代呢？
　　
其实睇此君的投注票，部分坐骑是有的，极可能不少赌仔夹叠赌佢开斋，希望爆出一只，执返输去的。
　　
我就冇咁「痴心情长剑」嘞。佢初来时，已见佢窒吓窒吓跑，又唔识走位，斗零都冇买！
　　
究竟佢输到几时，先会/肯/被请走？
　　
今晚快活谷赛事，提供「赤兔猴王」，过去五仗1W3Q1P，巅峰！