【曾智華專欄】有跑Vs.冇跑

認真的馬迷，必定會以嚴肅態度投入賽事，努力做功課，尤其是睇片！仔細研究，因每場馬陣上都可能發生不少難測因素，影響馬匹的發揮及名次。馬匹大熱倒灶，可能是意外，也可能是人為（唔去）。意外包括大漏閘、踩氹、馬匹發脾氣唔跑⋯⋯與騎師無關。
　　
人為呢，你知我知，呢家嘢最擅長是「軟硬鞭」，總之佢總能度出古靈精怪而競賽小組又儍吓儍吓信佢的理由甩身（例如聽到有人叫我）。
　　
從睇巡邏影片中，大家好易睇到邊隻馬及邊個騎師「有跑」與「冇跑」，又或純輸在意外。
　　
講返今季冠軍練馬師，人人話早已分勝負，因伍鵬志贏足一條街，其他人根本冇得追。
　　
我同意伍鵬志的確勁，但話Sure Win又未必！係呀，志仔已超過四十場頭馬，其他對手則仍是二字頭。不過，睇睇伍廄子彈已用得七七八八，而冚手的未用新馬多未成熟，應留下季，所以後半季佢好難仍嘭嘭聲大幅繼續放領。
　　
故此小弟睇好蔡約翰，隨時一發力就如飛殺上，過志仔頭！
　　
眾所周知，蔡神仙子彈無限，精品不絕，因大把馬主捧錢畀佢任使，如此，無數馬販當然爭相「巴結」佢，當神咁拜，最好的馬優先預留。
　　
今日神仙開始發力喇，出九隻，當中六隻可W可P，必須以佢為投注重心。
　　
「一定美麗」、「精算謀略」、「健康快車」、「金榜之星」及「豪堡」之外，另有一匹上次肯定冇跑過，正是蔡約翰練馬師賽馬團體的「鐵金剛」。
　　
上次十五倍冷門，潘頓出閘在尾，純試馬，入到直路，又撞落其他馬屁股，又阿吱阿咗，最後自動標上，只輸兩個多馬位。
　　
今日神仙全軍出擊，當以呢隻為纜躉，我一於瞓十蚊雞落去！