【曾智華專欄】「港鐵革命」必須成功

前日本欄出咗篇《港鐵快停「左行右企」》，結果引來不少迴響。
　　
第一批是普羅市民，似我般矇查查，唔知港鐵已經冇咗「左行右企」政策近十年。故此紛紛在網上留言，附和小弟的「牙煙觀察」，覺得左行右企容許扶手電梯運行時，左邊有人衝上衝落，非常危險，事實個別亦曾目睹意外發生。
　　
另一批又如何？正是港鐵的管理層及知情人士，前者呼冤，後者則代呼冤。因港鐵原來早早冇再提左行右企，改而宣傳「握扶手，企定定」，兼且為深入民心，更重金禮聘櫻桃小丸子任港鐵大使，在站內不停呼龥——握扶手，唔好行，左右兩邊企定定！
　　
好嘞，咁究竟點解港鐵站內，至今乘客仍會自自然然地「左行右企」？近十年的宣傳，為何未見龐大成效？肯定是「左行右企」概念遠遠比「握扶手、企定定」更深入民心，令習慣難改。
　　
咁如何處理呢？港鐵應該以「佛系」心態處理？又或下定決心，革命一日未成功，同志一日必須瞓身去努力推動呢？
　　
大學公共政策教材必有Policy Making and Implementing呢課。首先，政府不應身痕，亂訂政策擾民。不過，一旦反覆推敲，覺得大利益攸關的話，就要堅決排除萬難去落實，不成功誓不收手。方法不外乎：一、宣傳及教育；二、利誘；三、處罰。
　　
最佳當然是靠宣傳教育已成功，皆大歡喜。其次，在宣傳時，獎勵遵守者，也是好方法，令大家養成習慣。最下下的，就是靠罰靠嚇。
　　
一開始就靠罰，不理想。港鐵可先考慮動用大量「禮貌大使」在扶手電梯旁積極勸喻，唔掂就開始警告。最壞情況出現，就重手執法。大家可知，港鐵站內講粗口也可以被刑事起訴！