【曾智華專欄】冇晒胃口，大嶼早唞

制訂政策有時好難，有時好易，有時要經過精密調查科學化計算，有時呢？一眼就睇得出應該點做、應該嗱嗱聲做！
　　
例如掟天文數字走去冇雷公咁遠填海，冒掏空庫房的風險搞「明日大嶼」計劃，就真係儍嘅先會堅持做！
　　
高官唔好坐喺象牙塔頂諗嘢，得閒走去地踎茶記問吓牛頭角順嫂之流，已知有冇人會支持呢個「大愚計劃」。
　　
過去幾年香港的變化有目共睹，包括：
　　
一、冇乜人生仔，新人口越來越少；二、整體高速老化，即會越來越多人拜拜；三、十之六七年輕人冇興趣生BB，因諗唔通生嚟為乜？四、移民潮不斷，你知我知身邊仍有大量中產「蠢蠢欲動」，只差幾時動身；五、周街吉舖，日日執笠多過開張，蝕本生意當然冇人做；六、過去幾年買咗樓的，全部坐艇，有的撻訂，有的死頂，不知會否最終投降；七、息率高企，買乜樓都好，要供就好惡頂；八、工商業單位越來越多空置；九、大量新落成住宅單位變「庫存」，發展商頭都痕，唔知點散貨以令資金回籠；十、以前發展商不時強調自己的「土地儲備」（Land Bank）越大越好，見地即投，如今反而諗點甩手。
　　
小弟隨口噏都講出十個重點，政府高官收幾十萬元月薪，大權在握，會否唔知？當然唔會。咁就出現上周發展局局長甯漢豪突然高調聲明：市場冇胃口，今季停賣住宅地。
　　
政府絕對不應亦不可賤賣官地，故這只是做對第一步，下一步，若要救市，就應以開展心理戰，話畀全世界知，土地不會「無限量供應」。任何商品一旦求過於供，價值必插水。所以，應立即喝停個「明日大嶼」計劃，先打場「土地有限㗎」的心理戰。