【曾智華專欄】劉德華飾演「劉德華」

近兩年小弟誤打誤撞，成了老友的「應否入場盲公竹」。因個個知我乜電影都睇，多數上映第一日就衝去，故有「新鮮」影評。
　　
去年底鋪天蓋地宣傳的猛片《金手指》，不少人有意欲入場，尤其上年紀的，因太多集體回憶及親身經歷（蝕死在佳寧股票上），而對於陳松青這個傳奇人物也有獵奇之心，故此一百幾十元票價冇得慳。
　　
上周五《金手指》上映，小弟九點半殺去又一城戲院。咦，犀利，晨咁早竟有八成幾入座，可知大家對《金手指》有多大好奇。觸目所及皆白髮蒼蒼，以六十歲至八十歲為主。
　　
下午回家，N咁多信息彈出，個個問套戲掂唔掂？華仔與偉仔鍊演技，邊個贏？值唔值得買飛入場？
　　
呢類噱頭戲，一係唔睇，睇就趁早，以免人人睇完，在社交場合興奮劇透，咁你就冇癮矣。
　　
套戲成績唔算A級，B級啦。不過，咁重投資，咁大卡士（四大影帝：梁朝偉、劉德華、任達華及太保），影迷當然應睇，也要睇。
　　
今日我都想講講四大影帝的演出。任達華最少戲，冇乜機會發揮，相當浪費。
　　
太保不是巨星，但演技超班、氣場勁，每一出現渾身是戲，四個之中佢最標青。
　　
梁朝偉演技毋庸置疑，但由佢扮「陳松青」，基於瘦削外形及欠大蠱惑氣質，形神皆不似，點扮都唔夠奸。搵佢做主角，應純為票房。
　　
劉德華又如何？個個問！小弟直率感覺：劉德華繼續扮演劉德華，由電視劇《獵鷹》開始從未變改，大家慣晒。不過，佢咁靚仔，冇人會睇厭的。
　　
總之，劉德華在任何電影中繼續飾演「劉德華」，絕對冇人會柴台。
　　
睇過《富都青年》，真係弊，幾乎所有影帝的演技都比吳慷仁的高水平貶低晒。