【曾智華專欄】「軟硬鞭」示範行正道

武俠小說要受歡迎，必須凸顯戲劇性及矛盾性，當中尤其要有兩大高手扮演正及邪，N年前的美國摔角「表演」，也是沿用此設計，一度風靡無數觀眾，包括上世紀六十年代香港電視觀眾。
　　
套入馬圈，也有正邪。馬迷總覺得不少騎練蠱蠱惑惑，應贏唔贏。點解？因一場馬的幕後操控者，是可以「輸馬贏錢」的，明唔明？
　　
馬圈形象正氣的騎師不多，較著名的有馬佳善及雷誠，十場起碼博七、八場，故此連相格都是「忠」的。
　　
好了，十多年前香港又空降一個莫雷拉，初期滿臉正氣，笑容親切，即成萬人迷偶像，被封「雷神」，一度是馬迷投注的「扶手棍」。
　　
不過，馬圈如股市，有錢地方就有邪道，鱷魚潭之內，你單打獨鬥玩「正氣」？好難生存！自自然然有大量人影響你，結果「雷神」跑跑吓，就變「拉縮」嘞，冇癮？但這是現實！
　　
當今馬圈，論武功當然是冠軍騎師潘頓最高，但此君變隻手遮天後，就正邪之道集於一身，陣上經常表演「邪道」。奇在競賽小組次次變「盲公陳」。
　　
呢條「軟硬鞭」，到底是武林宗師，所以，有需要時會變回「正道」，跑出「黃飛鴻式」騎法。
　　
資深馬迷皆知，衡量騎師功力，不在其勇猛狂衝或打到隻馬飛起，而在𠱁到隻馬舒舒服服發揮最高水準（莫雷拉最勁），以及陣上走位攝位，也極具藝術成分。
　　
元旦潘頓就突然「正道」上身，示範大外檔贏短途經典演繹，真精彩！分別是「風雲武士」、「紅鬃烈馬」及「安泰」。
　　
近期賽事日子亂到陀陀擰，今晚又跑馬喇！冇咗潘頓、麥道朗及布文，二線騎師應輪流開飯。
　　
今晚第一場應刺激，三匹年輕馬，應是「郎善好施」拖「城中勇士」及「無限美麗」！