【曾智華專欄】跟「班長和」上順德

昨日講到老友「班長和」深知我為食成性，尤其鍾情廣東茶樓一盅兩件，但苦於香港大量採用中央工場機製點心，行貨充斥，水準滑落，好鬼冇癮，於是帶我上順德。
　　
「碌Sir，你成日話唔介意Walk a mile for乜乜物物，咁跟我上順德一轉，歎吓高質素手做廣東點心啦，若唔滿意，我畀個頭你當凳坐。」
　　
「嘩，和哥，有冇咁誇張呀？」
　　
「嗱，識人好過識字。我正正有位老友名周智豪，乃順德區保利假日酒店老總，佢著名識飲識食，覓得頂級點心師傅坐鎮中菜廳，出品點心正到飛起㗎！」
　　
「班長和」引到我口水流流，好，即去。坐兩個半鐘車，冇問題，沿途睇吓風景、聽吓經典歌，好快到，尤其選閒日，根本冇乜人過關，悠悠閒。
　　
呢間中菜廳名「錦雲樓」，有不少貴賓廳，「班長和」早早訂位，約埋幾位老友開點心大餐。
　　
少少冇癮，我一邊歎，個心一邊下沉。點解？唉⋯⋯人哋一間四星酒樓中菜的師傅，做出來的點心，品種之多，創新之強，質素之高，點解可以彈離香港咁遠？還未講，就是價錢之平！
　　
呢處我可以食到滑滑的布拉腸粉、懷舊味十足再加創意的飛天鹹煎餅、綿稠的新鮮豬雜生滾粥配即炸大油條。
　　
另外，廣東點心的「靈魂」，例如晶瑩皮薄的蝦餃、陳皮牛肉球（絕不會搓粉）、鮮蝦乾蒸燒賣⋯⋯以至廚師自家研發的竹炭肉鬆包，當然更有順德名產大良雙皮奶。點心款式之多，眼花瞭亂。終於決定留多一日，翌朝再Encore！
　　
此酒店老總周智豪是香港人，搞得此酒樓如此出色，我多口問：「可否回港照做，救吓市呢？」
　　
佢苦笑搖頭：「香港現今條件，邊有得搞？」
　　
地址：廣東省佛山市順德區倫教荔祥路
電話：86-757-28986888