【曾智华专栏】打默契波，跑默契马

火速踏入新的一年，祝大家2024年健康快乐，充满安宁，齐齐继续马照跑。
　　
波与马，一如股市与赌场，根本从来是个鳄鱼潭，一旦加入金钱，全部就是真假不分的赌博。有人问：「喂，明知造假，你班友仲玩，系咪儍啊？」
　　
你话儍又得，看透世情又得。总之你租个场打波都要畀钱，如今有人开咁多「游戏」畀你参与，只要你明白「游戏规则」，就可以从中得到无限乐趣。边个儍？若你真系以为赌波赌马赌股票及入赌场会长期赢钱，唔使做都会发达，咁你就真系儍得好严重，应该去到要入青山的水平！
　　
上周睇新闻，见到中国足协负责人宋凯爆出个新名词，真系绝，绝到我一听即大声叫「好」！然后兴奋到跌咗落地，因实在精彩。
　　
乜嘢名字咁巴闭？正是——打默契波！佢话中国要坚决杜绝假波、默契波等行为。
　　
真系天才先会度出「默契波」这名字。
　　
小弟久不久就会赢场几十倍的波，正因超级强队包括拜仁、皇马、巴塞、巴黎圣日耳门及些路迪等，在本国联赛打横行，因超强。但到时到候，就会「开饭」，拣一场「杯仔」赛事大打「默契波」，突然失手输畀丙组仔、丁组仔，但奇在完全冇人会提「打假波」。原因？当然是All Win，所有人包括台前幕后，甚至「监管」者，皆从中得益，故一切早早有晒默契，大家扮「盲公陈」。
　　
马场当然如是，点可能个个骑师及练马师会安排马匹场场「跑真」？儍咗咩！
　　
不过，明目张胆，好似「软硬鞭」咁，连予马迷有少少「默契」的动作都唔做，当然被闹爆啦！
　　
元旦大赛，「鬼佬新年」捧鬼佬！蔡约翰强阵，「气势」𡁻硬，但冇肉食。「红运帝王」有「加州星球」在，会分多几蚊！