【曾智华专栏】咁叻？你贴只Win睇吓

每次赛马，我都捧星岛集团的《赛马日在线》场，并非因佢贴士特别准，而是够轻松好玩，唔似官台般四平八稳，唧都唔笑（可能马会规定啩），欠缺娱乐性。须知赛马节目也是节目，忌太严肃。
　　
《赛马日在线》主持有一习惯，不停答观众留言。这个有好有唔好，因网上世界乜人都有，包括Haters、暴民及变态一族，佢哋因可以隐姓埋名，故人性最丑恶的纷纷呈现，粗口烂舌不止，兼且会撩交打、撩交嗌，誓要搞㷫你。
　　
上季不少Haters明知安西教练唔襟激，于是成日玩佢、窒佢，搞到反晒面。小弟提议黄以文老总，一于Block晒班无聊搞事Haters。因班友见安西动怒，佢哋就更得戚，但正常观众好反感。
　　
好嘞，今季开始掂晒嘞。不过，仍间中有个别会搞事挑衅主持。例如早两次贴士唔多准，就窒完一次又一次。终于有位主持忍唔住回应：「咁叻，你贴只Win睇吓吖！」
　　
此话一出，小弟笑到跌咗落地。回想二十年前有两个猛人，正正畀我要求贴一只必有位置的马，结果瘀爆。𠮶日开始，我就告戒自己，千祈咪牙擦擦，因莫讲冇马必定胜出，连位置也可以非常高难度！
　　
当日我分别公开问法国著名练马师宾康及马会前主席李福深：「请畀一只十拿九稳的位置马我吖！」
　　
结果宾康面色一变，但在老婆大人面前唔衰得，只好畀出旗下最热最劲一只，而李福深就畀自己拥有的马王「超捷」。结果惨情，全仆直！
　　
所以我今次挑战班牙擦友：「咁叻？贴只Win睇吓！」
　　
布文热身一次后，今晚会「开工」啩？「国大合」越长越好，捧！
　　
「九秒九」一档，边线！「华丽活力」一千米已近，千二米可开饭！三只皆可一博！