【曾智华专栏】「竞委会」应考虑执笠

2012年出世的「竞争事务委员会」，成立时大锣大鼓，给予香港人非常大期望，看似能够赶尽杀绝「合谋定价」，还市场公平竞争一个机会。
　　
结果？十一年下来，一句讲晒——得啖笑！入禀个案仅得十五宗，摆明此组织是「冇牙老虎」，故此冇生意，因气顶市民宁愿对不公的市场恶行吞咗算数，无谓浪费精神时间去求助竞委会，反正必定得个桔。
　　
小弟真诚认为竞委会与其存在又做唔到嘢，无谓浪费公帑嘞，执咗佢算啦，好等主席陈嘉殷抽身做其他「做到嘢」的机构好过。
　　
竞委会被人最大诟病为完全郁唔到「油魔」，任其日日狂舞，明目张胆摆明「划一定价」，真系盲嘅都睇到有人「打龙通」，但仍然冇办法咬得入，吹到全港车主胀晒，个个怒火中烧！
　　
竞委会永远推话——难以蒐集足够证据！
　　
犯案，例如凶杀案，当然最好有齐实据。但冇，也可钉得入，正是凭环境证供推断，只得被告是唯一的凶手。
　　
有记者以非常长时间，耐心记录香港五大油公司的定价，结论——离奇地一致！咁搞法，你话班「油魔」没有「无形但坚实的默契」？儍的才会信！
　　
陈主席在无晒符下，竟推话外国查重大的合谋个案，也要三五年！
　　
老友，咁你究竟郁咗手未呀？竞委会的出现，正因全社会怒吼嬲爆油公司揿住抢而成立，你搞咗八年仍不停用无聊借口继续拖？点解唔投降执笠？
　　
香港油价天咁高，背后有两大原因：一、地租贵，人人知。二、政府大力抽水（税），举例我入一缸油付五百六十蚊，政府竟然再抽燃油税一百七十五蚊！
　　
油价越高，政府越肥，这就解释到点解冇人会认真对付「油魔」！