【曾智华专栏】首次包场一开即爆

上月底手痕痕在此写咗篇《跟住碌Sir去睇戏》，因近两年睇咗不少非常出色的港产片，有质素，有讯息，导演个个用心，又充满诚意，技法也远胜多年前的屎尿屁及无厘头柴娃娃导演。故觉得有机会同大群志同道合影迷老友一齐睇，睇完一齐分享感受，定必是人生大快事。
　　
文章刊出后，当然有热水（支持你！快啲搞！），也有冷水（包场咁易？冇反应，蚀死你！）。
　　
小弟乃急先锋型人物，喜欢开创，即搞搞震，兼且视失败亦等闲，因早年参与体育活动，近年不停投资与投注，也知世界冇必胜。若你成日等到必胜才出招，可能会等到发霉。
　　
N年前与文坛长辈蔡澜闲谈，讲到监制多部电影经历过的困难，佢讲出个人的信念——试就五十五十，唔试就零鸡蛋！
　　
意即凡事冇必胜，但唔试就输硬！
　　
我绝对赞成，故此一有意念想做，即会计计输唔输得起，若唔会死人就去马，以免后悔。今次包场睇戏亦如是，死晒都只蚀几千蚊，在我的「输波」射程范围内也，唔入肉。
　　
一话做，就郁手。结果讲都唔信，一个星期内，由揾影院（多谢高先帮忙），决定放边套（近期最喜欢的《富都青年》，影帝吴慷仁演技惊人），公开报名，找酒家作影后聚餐（米芝莲推介的西环德记潮州菜）⋯⋯全部搞掂，顺利安排下，一开即闪电爆满。
　　
电影播完后，我与Winnie（高先老板）作影后分享，在座观众也纷纷讲出感受，包括资深新闻人陈早标，原来电影令在座者全有触动。
　　
一炮顺利打响，下一套也是影帝吴慷仁作品，香港电影发展局参与制片的《但愿人长久》，此电影未上已大受业界关注推荐，大家留意！