【曾智华专栏】勿搞出悲剧才收手

近日的香港，在各方力谷之下，不少大型活动颇具睇头。例如早前星光大道的LV Show，真真正正做到星光熠熠，绝对可吸引全球名牌排队到港照做。呢类活动绝对不用政府插手，只提供政策上「方便」便可。
　　
另外，马拉松、演唱会、巨星球赛排队出笼，真系——咁至似香港！
　　
冇乜声气多年的工展会，今年一开波，也见气势。一如本报上周日大标题形容：《工展会首日市民震撼式消费》！
　　
今次工展会有成九百个摊位，有酒饮，有美食，有平嘢，完全可以吸引最大公约数香港消费者，亦可能吸引到内地人南下，扫唔使担心「假嘢」的香港著名品牌。
　　
今年工展会开波，的确劲。不过，也睇到我一额汗，对住新闻，不禁自言自语：「喂，下次唔好再揾啲咁嘢搞啦，分分钟发生悲剧㗎！」
　　
乜事呢？正是工展会为造势，度出「一蚊鲍鱼福袋」，早早宣传，当然会有不少草根消费者摩拳擦掌——抢嘢！
　　
咁鬼着数，坊间一传十，十传百，吸引大量市民，不少是草根长者，早早结集门口，以便一开门就标入场抢购福袋。
　　
于是大家就见到一个非常危险、你抢我夺、前仆后继场面。结果出现有人跌到一仆一碌，今次好彩冇事，但试想想，若跌倒者为高龄阿公阿婆，咁随时会断骨崩鼻，危及性命，若真发生，成个工展会立即冇晒意义，兼且中华厂商联合会更会即时被千夫所指！
　　
玩「冲入场」，只合年轻人抢电竞产品呢类活动，佢哋仆低可以即刻弹起。
　　
但七老八十的工展会客，绝对玩唔起！工展会要宣传，不如宣传「工展小姐」选举啦！