【曾智华专栏】吓鬼死与吓到濑尿

昔日《晨光第一线》电台拍档侯嘉明（Alyson）上月传来信息，要求捐款支持，搞乜？正是佢为挑战自己，决定冒险接受一项非常惊险大行动，在一千呎高的港岛东中心（One Island East）游绳而下，为训练有志突破自己极限者而设的「香港外展信托基金」（Outward Bound Trust）筹款。
　　
我一睇，心谂：「哗，乜揾啲咁嘢搞呀阿妹，你已就快四张，又系三女之母，有乜需要揾啲咁危险嘢挑战自己呀？老公阿Paul又点睇呀？几个女又赞唔赞成呀？」
　　
但冇直接问佢。捐钱当然冇问题，不过，如此揾命博，会否临阵缩沙呢？又会否中途杀出有影响力的人（例如佢阿妈）喝止呢？
　　
时间一日一日过去，佢目标为筹二万元，好快已有一万一千元，睇嚟勒唔住，要去马嘞。
　　
好啦好啦，完成佢愿望啦。决定将「慈善同学会」船记饭局善款九千八百元捐晒畀佢，咁就一次过即达目标（最后共筹得四万几元）！
　　
行动当日，嘉明由老公与三个女陪伴，摸黑于凌晨出发，六时前已上到一千呎高的港岛东中心天台，由医护替佢先量血压、心跳等等，再由专业人员逐一绑好安全绳。
　　
然后在真真正正晨光第一线射出前，游绳而下，当天风势颇大。
　　
上主保佑，最后安全着陆。我去电问：「你有冇吓到濑尿呀？」
　　
有此一问，因的确见过不少挑战高难度者真真正正濑尿。早年在布吉岛见证N个游客以为好过瘾，坐飞天伞由快艇一拉，即刻扯上几百呎高空，之后惨叫连连，到降落时，真真正正一裤都系！
　　
执笔此稿前两日，哎吔吔，又见一日籍汉在澳门玩「笨猪跳」，落地后冇晒呼吸及心跳，瓜咗！所以，自己知自己事，咪乱逞一时之快！