【曾智华专栏】极度可疑推介片

资本主义世界，有钱就有贼，越多钱则越多骗子，有啲合法，有啲非法！
　　
合法的，不少在金融机构，包装成「金融才俊」，身光颈靓，好鬼掂咁款，多数醒目靓仔靓女，口马玲珑，声称有投资好推介（若掂，唔该佢自己瞓身买先，为乜要搞到成身汗𠱁人落叠？），其实目的只有一个：赚客钱而非替客人赚钱（若撞正就大家好彩）。
　　
近日又发觉YouTube上大量推介呢样𠮶样的「误导片」，话某某产品又平又正，甚至免费！总之最紧要你贪，咁就掂，十条有一条变水鱼已有排㓥。相信公司包拍，制造「市场反应」，误导消费者。其中之一，为「推介食肆」，揾大班临记，化身成不同食客，纷纷帮衬同一间餐馆，然后大赞特赞。
　　
本来我唔多觉嘅，但两月前突然涌出几条「食评推介」，讲及的同一餐馆，就在附近。
　　
五年前朋友要求齐齐去食：「睇睇能否畀多少意见。」此店出品平庸，只好勉强指出几处应该改善之处，之后当然冇再去。
　　
年来晨运经过，见佢做吓差啲，做吓又差啲，望入去，卫生情况麻麻，更冇意欲帮衬。
　　
去年此店突在附近街角摆出多个易拉架，上写：「小菜四十八，好过自己煮！」四十八？会有乜货色？平通街仍没有甚么起色。然后听见「东主出让」，疫情期，揾鬼接手？
　　
疫情过后，就在最近，突然在YouTube见几条片弹出，多位「街坊」推介此处的多款小菜又平又美味。小弟传媒出身，当然冇咁易乜都信，更何况班「演员」欠专业水准，表情假假哋？
　　
终于前日晨运经过，但见锁上铁闸，黑漆 一片，门口挂上「内部装修」。装修？为乜咁多条「推介片」涌出，仍搞到要「内部装修」？你应该明白嘅！