【曾智華專欄】半山區劏房

劏房，其實全世界都有，小弟正正有位老友P哥是「劏房大王」，不過，並非在香港搞，而是在美加大城市，例如多倫多、溫哥華、三藩市、羅省及紐約等。
　　
P哥專吼以上城市名牌大學附近的舊屋，凡跌價就買入，基本裝修一番，然後劏出十間八間獨立房，再租畀學生。
　　
基於每所大學都有萬計學生，不少屬外來的，要搵地方住。學校宿舍通常單位不足又或必須包食，收費不菲，兼多多規矩，故大量學生寧願買架單車，住學校附近，自由得多。因此，廉租劏房需求甚大。
　　
P哥將一間屋劏出八至十間房，每間月租五百至六百美元或加元，乾手淨腳收幾千美元或加元一個月，然後外判清潔管理，自己唔使上身，齋收租。只要房間Keep得好，根本不愁沒租客！
　　
香港又如何？劏房問題實在令人頭痛，滿布深水埗、太子、土瓜灣的劣質劏房曝光後，大大破壞香港形象。政府管治班子也受到頗大中央壓力，指示——必須搞掂佢！
　　
故才出現《施政報告》中宣布成立「解決劏房問題」工作組，由房屋局局長何永賢領軍。
　　
其實香港咁多劏房，除實際需求外，業主也的確好搵。有求自然有供，求之不盡，就會供之不盡。
　　
不過，你咪以為所有劏房皆在貧瘠地區，又或多數是劣質，原來劏房都有⋯⋯
　　
有乜？首先，原來半山區都有劏房，住的不少是專業人士，又或「金融才俊」。
　　
為乜有咁現象？又係市場需求。個別人士為製造「我好掂」形象，就力求住在富貴地區，以便客人或佢想「誤導」的業務相關者問：「你住邊？」就話住半山區！一個半山區單位，同樣可劏出五、六間房，一間每月收一萬六千元、一萬七千元，加埋好和味㗎！