【曾智华专栏】的士大哥心声

老友S经常坐的士，一上车就与的士大哥闲谈，因佢认为的士司机日日长时间在路上，乜嘢都见到，加上又乜人都可能坐的士，故此城市八卦及秘闻特多。

不过，一如「正常」乘客，遇上的士司机，十之六七毫无礼貌，个别更成身火，系人都闹。

呢种情况人人皆知，人人都受过。当然最火滚是遇上冚旗拣客，又或上咗车，知你坐短途就赶你落车。唔落？好，全程又快又窒又急煞，再大力掟弯发脾气。

究竟有几多的士司机会视乘客为「客人」，而有「待客之心、之礼」的呢？你话啦。

讲到做客，S哥前晚有奇遇：「碌Sir，呢个有趣，你写出嚟令读者开心吓啦！」

原来佢遇上一个健谈司机，沿途猛呻：「老友，香港死得㗎喇，边有人留低消费吖？

港元强，乜都贵，你有钱都去纸水低、样样平嘅日韩台泰啦。当然，最就手返内地！」

「咁你是否经常到内地消费呀？」S问。

「当然喇，一星期起码三、四晚！嗱，午夜收工，成班同行将车泊边境附近停车场或烂地，咁夜好少食牛肉干，然后过关去深圳。揾间场揼骨，通常都提供任食自助餐，食饱饱，揼得舒舒服服，在按摩房瞓到天光，四、五百人仔乜都掂，天光再返香港攞车开工！」

「咁都几烦㖞。出出入入，又唔系屋企，仲有冇其他吸引呢？」S哥又问。

「当然有啦。喺香港，无论到骨场或酒楼食肆，不少服务员都似食咗火药，又经常窒客，又毫无礼貌。呢呢，返深圳就唔同嘞，我去到边都真真正正有做客人的优越感，处处诚意接待，感觉零舍唔同！」

S会心微笑，乜的士司机都会知「客人」要求乜嘅咩？咁点解班大哥回港一开工，即忘记乜叫「客人」？