【曾智華專欄】打殘黑友絕不留手

早前有兩條離晒大譜的視頻在網上瘋傳，一為躁男當街打女友，連環掌摑、扯髮及腳踢，對方跪地求饒仍不收手，令人髮指。
　　
另一宗發生在屯門山景邨，自稱「陀地」的黑友對執行鎖車的保安員拳打腳踢，叫囂咆哮，態度狂妄，目無法紀。
　　
結果兩宗案都火速破案拉人！
　　
兩件案性質不同，警方處理也有程度上的分別。第一宗情侶爭拗，男方態度粗野，正式拘捕，告「襲擊造成實際身體傷害」，再掟入「臭格」四十八小時，等佢靜思己過，這種基本教訓應已鎮得住。況且該名男子多數會判監禁或入勞教中心（因十六歲）跟尾，唔易捱。
　　
第二宗又如何？程度提升到「一哥」親自處理！
　　
此案不是個人恩怨、醉酒失控咁簡單，而是「撻朵」再公然毆打執行職務者，若輕輕放過，會出現「今日治安邊個話事」的大疑惑。
　　
大家可記得，N年前也有一名古惑仔囂張公開宣布：「十二點之後呢度我話事！」
　　
呢句名言曝光之後，這位豪氣新紮立即變成「佗衰家」。因引來治安當局高調顯示——香港二十四小時由政府話事！不但拉佢，更將成個所屬社團剷起，搞到黑幫兄弟不是著草，就是冇啖好食，變成過街老鼠，從此衰晒。此事也曾拍成電影，夠戲劇性也。
　　
好嘞，多年後屯門班新紮黑友又開始冇識死，竟再玩「呢度邊個話事」戇居遊戲。
　　
你係警隊一哥會點反應？仲使問？當然高高調調話畀全香港知，咁做蠢過隻豬！自己死梗外，更會累街坊。
　　
果然一哥連日親自督師，將相關黑友拉呀拉，至今拉咗近五十人，辣手掃場不停做，誓將整個屯門黑幫連根拔。因要話你知——邊個話緊事！