【曾智华专栏】喜见新势力涌现

任何一个圈子，要进步就要生生不息，必须不断有新人新事新力量涌现，马圈当然不例外。
　　
每年马会皆引入新骑师，有的好，有的差，马迷眼睛雪亮，一睇就知边件入错货。
　　
例如今季仍是三零部队的嘉里，跑二十五场，零鸡蛋，冠亚季殿皆一片空白，都唔知佢仍留喺香港为乜？当然，也少有练马师会畀佢浪费子弹。
　　
幸而今季三条过江龙冇入错货。艾兆礼、艾道拿及董明朗经过两个月熟习环境后，开始嚟料，尤其在沙田，跑道够阔，适合大显身手。
　　
睇骑师有冇斗志，其中一项为睇入位多唔多。一场马只得一只W，当然搏甩髀未必掂。但二三四名呢？若马有实力，骑师交得准，必会有多匹可以入到。以上三位骑师正是。
　　
终于上周日爆发，三人共取得四W二Q一P，收获甚丰。尤其艾道拿，杀埋二级赛精英碗。
　　
至今为止，三位仍不似潘顿及布文般孭飞，有分头，各位应趁「风光好」多留意。
　　
刚刚一战，又有一事要记存，勿因见郭富城出现就以为博马，瞓身WP。
　　
当日城城呼朋唤友入场，阵容鼎盛，不过我一睇，非常唔对路，「舞林密码」竟有七倍，而方厩当日「拍乌蝇」，加上此马未跑过千四米，种种迹象显示——瓜得！当然冇买。不过，可能仍有马迷见城城就瞓落去WP，真系喊都无谓。
　　
今晚全泥宴，唔好玩都要玩，支持善举嘛！
　　
「软硬鞭」潘顿连输十六只大热，畀人柴到甩肺，尤其输「金钻贵人」，被指阵上玩「东张西望」。今晚仲唔知衰，赢马交代？我选两只心水：一、「盈岚」。周俊乐有得试闸冇得骑，摆明揾潘顿博；二、「自强不息」，上仗大胜加六分，四岁马，未止步！