【曾智华专栏】马有，望空，爆得

今日标题讲边个？法国仔贺铭年是也！讲佢，因贺仔本周三爆咗只七十五倍巨冷「马有运」，位置都派一百三十元，极度夸张！
　　
贺铭年三十二岁，2019年开始来港，睇佢在法国战绩，认真平平无奇，最巴闭只在2012年赢过法国打吡，之外冇再赢过一级赛了。来港几年，至今也只得八十一场头马，在香港属中下游骑师。
　　
点解中下游？因佢骑功整体甚渣，由抢闸、走位、步速控制到掌握马匹节奏全部普通装，绝没高手风范及功力。
　　
不过，佢有一味正是其他骑师冇的，若练马师知道任何马食呢招，就爆得！
　　
系乜？正是最后一百米左右手狂抽前后狠鞭。大家想欣赏，易，睇返佢今季赢出的两场终点前点跑就知，一只是「闪电烈马」，另一只是「马有运」。
　　
贺铭年今季出赛二十八次，正牌Win Or Nothing骑师。二三四位空白一片，只两W。
　　
但论派彩，你投注二百八十元，派近八百五十元，几倍利润呀！大家记存啦。
　　
明日又有级制赛，二级跑千二米，精英碗，总奖金五百三十五万元。
　　
六只马参赛，会否又中——高班、让磅、马少＝爆冷定律呢？今次难咯！因「金钻贵人」已热身一次，面对高奖金赛事，点都要去马嘞。
　　
不过，睇嚟呢只短途马王实力经已Peak（摸顶）咗，难再进一步。相反，「维港智能」仍在不断上升中，若前者太热，咁就用后者二重彩行头可也。
　　
呢场马排位时，只得三位骑师落名，包括潘顿、田泰安及巴度。意即其他三匹为临时拉伕，唔荒会爆得去边。巴度只「顺势而飞」大蚀分，应冷，但仍要跑，为乜？如此，咁就买「金钻贵人」、「维港智能」及「顺势而飞」复式二重彩好了，博有得嗌：「上上上！」