【曾智华专栏】战争片可以咁拍

上周四晨早，照例打开最新上画表，睇睇有乜电影能吸引我第一时间冲去睇长者早场。
　　
《孤注一掷》？内地片，唔知有冇Feel，先不考虑。《威尼斯谋杀案》？非我杯茶，次选。再睇⋯⋯吓，唔系嘛，仲嚟？仲未「磨」够？讲边套？正是《轰天猛将4》。
　　
呢个系列在2010年开始系威系势，成班银幕猛男英雄，为正义执行一项又一项「不可能的任务」，追杀邪恶分子（例菜设计），虽则个个早过咗黄金巅峰，但仍充满魅力，娱乐性相当丰富。
　　
不过，随着日子过去，添食拍第二集，又嚟拍第三集，主角们的老态，无论点化妆、点用科技迁就皆日趋明显，喂！大佬，仲点「轰天」啊？
　　
好啦，到咗今天，史泰龙已七十七岁，但佢明显整容，打Botox打到个面变晒形，仲要出嚟扮英雄？老老实实，我就有点不忍卒睹嘞，当然拒绝入场。
　　
咁，睇边套呢？咦⋯⋯呢套啦！
　　
边套？正是德国金像奖导演玛姬佩伦最新杰作，真人真事改编的《大伪术师》（《TheForger》）。
　　
电影将大家带回1942年的纳粹德国时期，犹太人全被逼害，故要想办法逃生。
　　
刚刚有位犹太年轻天才西奥马，拥有艺术天分，由做军备到假护照皆非常出色，于是暗暗与地下组织合作，为逃亡的犹太人做假护照，而自己也换来粮食配给券（等于钞票），可以享乐，甚至追求心仪的女孩。
　　
战争片本多残酷沉郁紧张冷血，但此片在佩伦炮制下，散发出阵阵浪漫幽默，尤其摄影及配乐，更令人感到舒服温馨。
　　
《大伪术师》成为柏林影展的「特别展影」推介，绝对实至名归，乃今个期档耀眼之作。
　　
德国片，我绝少睇，今次眼前一亮，尤其男女主角，颜值非常高。