【曾智华专栏】「头大冇脑」之人

艺人明星，荧幕上英明神武，运筹帷幄，中外如是。咁，荧幕下又如何？
　　
说穿了，其实佢哋在幕前一切，皆有齐剧本、化妆、美指、灯光、摄影，再加导演塑造，故此投射出来的形象，与其真人冇乜关系。
　　
所以，落妆后冇咗剧本美指导演⋯⋯的协助，立时打回原形变普通人，平平无奇。
　　
不止，基于佢哋有名气，唔方便四围去，连返学校读书或到工联会上兴趣班机会都冇，一日只困在影棚、电视台、排练室，接触的人物事物少之又少，导致见识也相对地少。
　　
小弟多年所见，不少艺人相当单纯天真，甚至无知，极易畀人摆布利用，甚至引来骗棍专门呃佢哋。
　　
最简单，艺人若当红，揾钱自然易，现金多，必定手痒，但欠缺投资功力，此时必有众多「投资顾问」主动献身，美其名替佢哋揾钱，实质是通过买入卖出，上下其手赚佣，更奸的当然连艺人的老本也会用蛊惑手法转走。
　　
同时不少行业的「棍」，睇通艺人多想做生意，尤其涉足饮食业，误以为最易揾钱，于是各类「餐馆蛇」就埋明星身，扬言一人一份，自己落水，亲力亲为打理，明星咁忙，单单坐地分利已可。难得有不少儍艺人会信，结果部分蚀到裤甩不止，更上晒身孭下大笔烂帐。
　　
最近似虚拟货币骗案，大家又可见到，很多呢类古灵精怪行业，为建立自己形象及「公信力」，从而吸引水鱼入笼被㓥，所以，骗棍小财唔出，大财唔入，多会重金聘请巨星卖广告，做代言人。
　　
不少艺人，甚至经理人，头脑简单，见大嚿钱即失去理性，总之有「合理价钱」，就唔知卖乜都托塔应承。结果？分分钟千年英名一朝丧！