【曾智華專欄】紅山半島做硬示範

眾所周知香港遍布非法僭建，尤其村屋及獨立屋，都幾難搵到零僭建的「示範單位」。
　　
點解？因政府根本冇執法意志。例如早年林鄭月娥想開工，逼丁屋僭建清拆，結果發覺抗拒力度之大，超乎想像，唯有冚旗，畀人笑都當聽唔到。
　　
豪華獨立屋又如何？更加明目張膽（大家如今見到紅山半島海邊一堆，只是冰山一角！），尤其是掘地牢，外邊見唔到，更加你又掘、我又掘，話知搞到地基如何危險！
　　
點解會咁？人性就是貪，加上在冇人知道、冇人理，甚至冇人執法情況下，當然靜靜雞加大居所空間。你可知僭建多一呎，感覺上佔咗幾多便宜空間？
　　
兼且僭建有傳染性，A業主見到B業主做，又冇後果，自己唔做咪好老襯？於是A又做，然後C、D、E、F、G個個都做，反正做，咁就做到最盡為止。
　　
政府係咪唔知？當然唔係。以為冇人知，你估政府儍的嗎？但凡公務員做嘢，一定取易不取難。四萬幾幢大廈畀人「恰」，當然先做，唔做告上法庭，睇你點。
　　
但去到丁屋及獨立屋僭建，立時執法意志弱晒，於是強調「邊啲嚴重，邊啲做先」，正待執法機遇（Law Enforcement Window）出現，這亦是公共行政的一項策略。
　　
好嘞，如今紅山半島山泥傾瀉，災難隨時出現，正正露出一個千載難逢執法機遇。此時郁手，面對的是大群僭建的「次級富豪」，多數有頭有面，唔敢挺身死撐，加上民意一面倒，故此，特首李家超以呢單Case樹立權威，最為理想。
　　
一於下令所有僭建拆拆拆，然後再到西貢N間獨立屋，再到……
　　
紅山半島做硬「執法示範」嘞。