【曾智華專欄】藝人必須珍惜羽毛

藝人明星，在鏡頭前、在台上，可能英明神武，魅力四射，運籌帷幄，但一旦Off Camera，又或步到台下，可能相當膚淺天真。
　　
事實年來小弟不知見盡幾多男女藝人被騙，不過，基於有名氣，又唔想畀人知道笑問咁蠢，所以，不少都「嗗」聲吞咗佢，當買教訓交學費。
　　
明星，因有名氣，亦會特多各路人馬想黐埋去認親認戚。粉絲當然有，大闊佬也不少，江湖人士更多，而藝人的圈子也很多是黑白不分的。
　　
強如荷里活，大家睇睇歷史，都知有不少電影投資者，其實是三山五嶽人馬。
　　
講返藝人，靠乜搵食？當然靠技藝。但其實更重要，為形象及公信力。
　　
你形象好，公信力高，自然身價高。別人找你做代言人或拍廣告時，可以開高點價錢。故此，有質素又精明的藝人，必定有一個或一隊保護者，擋開不必要或不合形象的邀請及活動。
　　
因為外間太多人想利用藝人的名氣來達致商業目的，甚至行騙目的！
　　
行騙？百分百真實。不少產品，尤其不受監管的成藥及所謂金融產品，其實都介乎合法與非法之間。但若搵到有公信力藝人背書（Endorse），立即變成全「可靠」。
　　
今日觸動小弟寫本文，因見到《星島申訴王》又建一功，派臥底踢爆一個假招聘真行騙的騙局。騙徒為騎騎呢呢的一家人，出馬游說「水魚」時，猛強調話有乜乜物物必贏方程式，然後亮出短片，指有明星代言推廣。
　　
事後記者走訪藝人，竟直認不諱：「有朋友叫到咪幫吓手囉！」又話：「有出鏡費咪拍囉！」
　
吓？咁都得？連對方係乜人、來自乜機構、

將條片點用都唔知，就真身去背書？
　　
戇居又不懂珍惜羽毛！