【曾智华专栏】转风？自噏？

周一早上夹着大叠报章到茶记食早餐，未坐低已听到班的士大哥开《城市论坛》，讲到好兴奋咁款。
　　
我离远𥄫到佢哋指住《星岛日报》猛讲。睇睇头条系乜先⋯⋯哦⋯⋯大围「围方」爆棚，人潮逼到港铁站，区外市民专程「血拼」。
　　
有乜咁巴闭呀？「新厕所」效应啫。论商场，大部分当旺港铁站上盖都有啦。头一两星期人头涌涌，唔代表乜嘅，分分钟「新厕所」效应过去后，班区外消费者又会走返去又一城、圆方、乐富、荷里活、德福⋯⋯甚至过海去太古城、时代、金钟太古、置地⋯⋯等商场呢！
　　
不过，再听真啲，咦⋯⋯唔系㖞，佢哋并非讲商场，系讲一位政治人物，「西环契仔」谢伟俊噃，究竟有乜大新闻？火速揭开《星岛日报》先。
　　
原来有个专访，大半版报道。唔⋯⋯睇嚟应该系受上周刘慧卿个访问引发的。因当日老谢在Emily节目中爆出：「政府执行上太左，有啲过咗位！」
　　
今届立法会，记者想揾认真批评政府的议员难过乜，故餐餐都系狄志远，以及新扎的江玉欢，但两人对政治议题仍相当避忌。
　　
这个与以前的立法会，反差太太太大了。
　　
难得突然有个谢伟俊肯讲，我系记者都捉住佢「斩多几両」啦。佢老哥又几鬼幽默，开宗明义唔太Buy连「软对抗」都唔准，但引用例子相当过瘾：「现时太多行为被归入『软对抗』，其实从根本去控制市民思想并不可行，必须尊重大家的自由意愿！好比情侣夫妇，你点可以要求对方日日讲『我爱你』咁肉麻㗎，我和白姐姐之间都冇咗呢种要求啦！其实，互相关心，底线是绝不『偷食』，咁就够喇！」
　　
老谢言论，的士大哥十分啱听，畀咗几个Like佢才一哄而散。