【曾智华专栏】无敌是最寂寞

当今香港马坛一哥潘顿，一如所有马迷预料，终在上周日创造历史纪录，今季已赢到173W，打破莫雷拉2016年/2017年所创下的纪录，成为史上单季最多W的骑师。

你服唔服？我就唔多服嘞！

冇人会否认潘顿的骑功是现今香港最高，事实，根本难有人可以接近。

不过，佢今季创造历史，绝非甚么伟大成就！本栏读者必知，小弟对莫雷拉离港前大段时间的策骑作风相当不满，曾揶揄为「拉缩」。但公道点讲，若有佢在，潘顿绝冇机会打破历史纪录！当年拉叔是面对潘顿如此犀利对手下，取得170W的，难度与潘顿今季所面对的完全不同！

今天马圈，客观形势是潘顿「只手遮天」，对，佢骑功最高，但更重要，几乎所有最顶级的好马（除咗「金鎗六十」），全被佢「霸」晒（当然也有不少马是「求」佢骑的）。比起其他骑师，根本是活在另一境界，垄断的马也是另一水平。

在这情况下破纪录，怎说也难令人信服，摆明屈机也。

远的唔讲，单讲上周日的马，你知我知，佢赢的四匹之中，「嘉应奖升」、「勤德威力」及「骄阳明驹」，套用张福元术语，摆明大超班，可以「行返嚟赢」，讲真，边个骑都W啦，使鬼佢咩。

发展到今天，香港赛马最冇瘾为畀潘顿玩晒，相信任何高手都唔会开心得去边，因为无敌是最寂寞，无相近水平高手在阵，佢骑功又岂能再进步？再加咁多好马骑，单手都赢啦！

今晚快活谷，潘顿威完，应该唞吓，畀其他人揾啖食嘞。我会𥄫实上周日「梦游马场」，三只跑包尾的田鸡！希望佢生生性性，为何良赢「包装大奖」。另一只何廐马「谦谦君子」也是边线，诚心希望老何能毕业！