【曾智华专栏】最受欢迎练马师

睇见今日标题，马迷老友必定「吓」的一声。
　　
点解？因香港根本就冇「最受欢迎练马师」选举，而所有马会举办的选举，已于昨日截止。
　　
马迷老友啱晒！不过咁，我指的「最受欢迎练马师」，并非由公众选出的，而是小弟多年观察，以及由圈中老友提供的。
　　
边个有咁「江湖地位」？
　　
众所周知，马圈乃一个山头林立、名利争夺的圈子，尤其练马师，除个个有英雄感，爱威爱赢之外，好马也是你争我夺、你撬我挖。无他，有靓马才有赢马本钱，有赢马本钱才会财源滚滚又威威。故此，基本上练马师之间，不会存在太多老友感情，多只是嘻嘻哈哈。
　　
不过，若果你性格较易相处、较乐观，又或较识做，咁起码冇咁乞人憎。
　　
未讲圈内最受欢迎，先讲最乞人憎的，华洋各有一个，乃公认的。基本上，差不多所有练马师同佢两个都不但冇交情，亦冇乜偈倾。
　　
我当然唔会在此公开，大家自己估好了。
　　
但最受欢迎的，就可揭晓，正是方嘉柏。
　　
方仔自幼在香港马圈打滚，人脉固然四通八达，加上处事有开埋（记得郑俊伟掟马簿事件吗？），故广结人缘，除咗一个骑师！两人误会之深，难以想像。
　　
想知边个？易，打开骑练合作，方仔个个骑师都有交易，只有一个冇，而主角骑师亦是个个马房有交易，唯一与方厩水沟油！
　　
高伯新拜拜，上周搞送别宴，也可睇到点点圈内关系，正是一个华人练马师都冇份！而最乞人憎的那位外籍练马师，当然也冇份！
　　
明天戏码普通。蔡神仙出得「骄阳明驹」，当然不会只热食一只！预埋「魅力一心」、「速递奇兵」及够钟见真章的「安泰」啦，后者应有分头！