【曾智华专栏】裙拉裤甩倒泻箩蟹

边个群拉裤甩？边个倒泻箩蟹？正是一众出版商及印刷商，因为全行都在冲死线！
　　
死线就在7月18日，因为《第33届香港书展》7月19日开波，若7月18日仍未有齐所有新出版的书上架，想蚀死乎？
　　
不过，印刷商就似装修判头，十之九九不会在承诺的日期完工，点都要拖拖拖，拖到跌落悬崖前才交货，次次搞到班客心脏病发，今年当然唔例外。
　　
我点知？因为小弟几位老友出书，想先睹为快，若有料的话，帮佢哋打锣打鼓，搞旺个市嘛。
　　
点知个个同样苦口苦面答：「唉⋯⋯追到几乎反面，但出版商根本唔敢话几时有书，只敢讲，7月19日在会场必定有！」
　　
香港书展，经历2019年社会运动及之后的疫情，去年复办时，个个本来唔睇好，因大量书种随着社会形势而消失。点知全部跌眼镜！竟有八十五万人入场！
　　
今年又如何？冇理由突然变差啩？
　　
究竟今年会流行乜书种呢？肯定社会政治书，冇出版商博，以免浪费子弹。起而代之，三种一定推：一、香港有二百几万初老及老咗的市民，故此，一切关乎点做智慧长者的书，肯定大卖。去年老人科权威梁万福医生的《好好准备变老》大卖特卖，踏入今年走势仍劲，最近更鲤鱼翻身，再弹返上「健康、生活」类书的第一位！二、一切有关面对移民生活的书，这个毋须言明，心照。三、通关后，出外旅游热潮劲度反弹，介绍深度自由行的书大为渴市。四、科技书籍，配合大潮流。
　　
至于以往曾经大卖的财经书，今年谢谢哋，因市道唔掂。
　　
事实，出惯呢类书的财经评论员，自己都挨得好辛苦，点教人投资呢？