【曾智华专栏】「坚又威」赢得未？

哈哈，唔知点解，过去几个月不停有老友问：「喂，碌Sir，『坚又威』赢得未呀？」
　　
2月19日之前，更有老友窒：「喂，你班圣Joe仔千祈咪收埋食呀，听讲只马好劲揪，可以一出即胜，父系『精明火箭』Smart Missile㖞！」
　　
结果你知我知，首次登场，「坚又威」近都唔近吓，输近六个马位。其实𠮶场只马仲生，苏兆辉转入直路摆明「弃胡」，故输咁远。
　　
4月30日再出，配马昆，四档，但上场输得太远，冇乜人信会变身，结果十二倍跑入Q，明显有势，但仍输两个半马位。
　　
此时，肯定大量马迷认定第三场会到位，所以说虽排十四档，配何泽尧，竟热到六点八倍，完全唔合逻辑，我当然冇买。
　　
赛前马迷睇见沙圈「坚又威」的空群而出捧场阵容，一定以为冇得输嘞（包括零零亨？）。
　　
「坚又威赛马团体」由多位圣若瑟旧生合组，个个有家人，兼马匹出赛时，又会请埋旧日校长、老师一齐打气，当然更会有百计旧同学乘机聚会，于是咪搞到咁墟冚囉，其实完全同是否赢得冇关㗎。
　　
所以，各位今日若又见到沙圈成群打着绿白呔阿哥阿叔阿伯，欢天喜地拖男带女扶老携幼，咪又以为「坚又威」必定起筷呀，未必㗎！
　　
事实只马只得3岁，若畀我揸Fit，一定会同姚本辉商量，是否应畀佢提早唞暑。因四个月跑三场，对BB马来讲，可能有少少谷多咗。
　　
不过，无论如何，今日一定又极之惹飞，赔率与机会未必成正比。若太热，就要睇值博率喇！
　　
我又如何？「母校马」有感情，一于捧50元W，唔使补P嘞。点解？今次「软硬鞭」潘顿骑，十档加程二百米，佢未摸过。
　　
此君作风冇兴趣跑第二，入直路若发觉W唔到，就立即收工！