【曾智华专栏】学历履历财力病历

不少人话：「世界好唔公平！」
　　
我绝对认同，也绝对不认同。认同的是先天部分，不认同的是后天部分。
　　
先天，冇得救。例如你一出世，就已定咗几高几矮、乜嘢肤色、父母是谁、样貌如何，连头发浓密及五官端正否，全部定型。呢种注定的一切，冇乜公唔公平，天生。
　　
但后天呢？百分之九十种瓜得瓜，种豆得豆。尤其入到职场，大家根本无「先天」，只讲表现时，若你成堆烂泥款，冇礼貌、唔专业、

不增值、吞卜蛇王、人缘差劲，对内对外关系一塌糊涂，咁请问你仲有乜条件、有乜本钱，希望得到「公平」？唯一的「公平」，就算你不被炒鱿，也是永远在公司最低层做浮游生物，人人都冇兴趣同你交往。
　　
放大睇，其实整个人生也如是。
　　
老友罗国森擅长人生规划及财务规划，佢有一个理念，为人生分上下半场。从佢观察，上半场搏老命者，用种瓜得瓜理论，一定系学历高、履历高，又或财力高。因无论读书、工作的拼劲，以及投入的时间及牺牲，永远犀利过平排竞争者，自然「两历一力」特别骄人。
　　
不过，咁搏法，一定在智力及体力方面大大超支，心理负荷也永远比适可而止一族重得多。若用机器和车辆比拟，架架车都应该可行10万公里的，但你一落地即狂谷，又唔畀佢充分休息，又唔锡住用，更成日话冇时间，唔攞去Check车保养，咁⋯⋯到下半场咪收成囉。
　　
罗国森见到的，正是不少上半场的「法拉利」，下半场变老爷「烂车」，件件零件（器官）都出问题，见医生多过见老友。
　　
你话系咪好公平？老友，你又想谷到架车爆偈，但又想佢十几年后仍似新车？有冇咁符碌？