【曾智華專欄】父親節馬照跑

母親節一定不可以跑馬，想死乎？父親節又如何？不但馬照跑，兼且跑足十一場，餵到你飽為止！
　　
不少人問我：「碌Sir，對黃昏馬點睇？」
　　
我的分析：「肯定投注額會跌。因周日是家庭日，你搞到不少家庭未能一齊晚飯，肯定有問題。兼且並非個個老公都咁大膽『寧愛賽馬，不愛家庭』，想死乎？此外，大量社交飲宴也在周日晚，不少屬畀面派對，唔出席唔得，當然被逼放棄跑馬。種種加埋，投注額及入場人數下跌，實屬正常。」
　　
另外，又有非馬迷向我揶揄：「跑馬？Out啦，老餅玩意，你睇投注站逼滿乜年紀人？」
　　
真係拗都嘥氣。非馬迷唔喜歡賽馬運動，就先天認為死梗，勢將步向新加坡條陰乾路。
　　
係真唔係真？首先講講老餅才喜歡跑馬。奇，當我十幾歲時都係咁諗，因凡見到馬迷，形象就個個是中年或老年男人。
　　
好嘞，半個世紀過去啦，自己都變咗老男人，五十年前愛跑馬的中老年男人，理論上死光囉喎，咁今天又點解仍有幾十萬甚至上百萬馬迷呢？
　　
好多非馬迷指：「有冇作大呀？有幾十萬馬迷？邊度嚟呀？」
　　
投注額最易睇，因個個真金白銀。如今平均日馬投注十五、十六億元，即係點？即係若平均每名投注者「玩」一千蚊一日（都幾勁㗎喇，多過我呀！），即有一百五十萬人參與這遊戲！當然，可能不少身在外地，但香港起碼應有近百萬各種年齡、性別馬迷，絕對「冇走雞」㗎。
　　
周三本欄標題《替鄭俊偉打氣》，佢睇完即託人致謝，可惜又食白果。好，今日繼續精神及實質支持！
　　
新馬場合以鄭廄「驍勇者」與「襌勝輝煌」、「鈦易搵」及「耀寶駒」互串。
　　
另捧埋田雞隻「滿歡笑」 ！