【曾智华专栏】父亲节马照跑

母亲节一定不可以跑马，想死乎？父亲节又如何？不但马照跑，兼且跑足十一场，喂到你饱为止！
　　
不少人问我：「碌Sir，对黄昏马点睇？」
　　
我的分析：「肯定投注额会跌。因周日是家庭日，你搞到不少家庭未能一齐晚饭，肯定有问题。兼且并非个个老公都咁大胆『宁爱赛马，不爱家庭』，想死乎？此外，大量社交饮宴也在周日晚，不少属畀面派对，唔出席唔得，当然被逼放弃跑马。种种加埋，投注额及入场人数下跌，实属正常。」
　　
另外，又有非马迷向我揶揄：「跑马？Out啦，老饼玩意，你睇投注站逼满乜年纪人？」
　　
真系拗都嘥气。非马迷唔喜欢赛马运动，就先天认为死梗，势将步向新加坡条阴干路。
　　
系真唔系真？首先讲讲老饼才喜欢跑马。奇，当我十几岁时都系咁谂，因凡见到马迷，形象就个个是中年或老年男人。
　　
好嘞，半个世纪过去啦，自己都变咗老男人，五十年前爱跑马的中老年男人，理论上死光囉㖞，咁今天又点解仍有几十万甚至上百万马迷呢？
　　
好多非马迷指：「有冇作大呀？有几十万马迷？边度嚟呀？」
　　
投注额最易睇，因个个真金白银。如今平均日马投注十五、十六亿元，即系点？即系若平均每名投注者「玩」一千蚊一日（都几劲㗎喇，多过我呀！），即有一百五十万人参与这游戏！当然，可能不少身在外地，但香港起码应有近百万各种年龄、性别马迷，绝对「冇走鸡」㗎。
　　
周三本栏标题《替郑俊伟打气》，佢睇完即托人致谢，可惜又食白果。好，今日继续精神及实质支持！
　　
新马场合以郑厩「骁勇者」与「襌胜辉煌」、「钛易揾」及「耀宝驹」互串。
　　
另捧埋田鸡只「满欢笑」 ！