【曾智华专栏】你唔做？佢即接！

土瓜湾的老街坊，冇人会唔认识江苏街七喜面食小馆。此店已有数十年历史，虽则细细间，但晚晚人流鼎盛，客如流水，经常排队。

事实，七喜不卖环境及舒适（冇枱布、坐折凳、逼逼贡，摆明唔该速速食完，快快离席畀下一位），但仍爆到七彩，点解？

简单，平靓正，老板严先生日日监场，亲自下厨，出品由蒸煎焖炖炒小菜到云吞水饺面食，再到虾球花胶粥，全部质素有保证，同一收费，难寻对手，故此，好生意到要摆出街。

结果当然被不停投诉，尤其深夜，不少客人几支大啤到肚，说话豪情奔放，影响街坊睡眠。

基于太多新旧客，二十年前严老板再在隔篱浙江街租下一铺，以作「食客分流」。一直冇问题，直至⋯⋯三年前，大件事，两间铺开吓又唔准开，生意插水式下跌。

刚刚此时土瓜湾港铁站落成，即时效果系⋯⋯业主飞擒大咬，约满即加二万元！

咁即系赚埋畀佢？于是严老板痛下决定，将浙江街二十年小铺冚旗，唔做嘞。

昨晚又去七喜老铺买广东水饺回家自煮，与老板闲聊两句。佢一开口，已狂喷苦水：「碌Sir，个业主真系离晒大谱！过去二十年，我月月准时交租，计计埋埋已过千万
元！养足佢二十年，约满竟狮子开大口？唔做咪罢囉！」

这就是香港行资本主义的现实！业主不是善长，法例容许赚到尽，被指无良也懒理。挽住袋水饺行过浙江街攞车，咦⋯⋯七喜唔租一个月啫，个铺晚上仍灯光火著，但见水电油漆工人全在赶赶赶，新人接手了。
　　
这类铺永远鸡死鸡鸣，因有晒图则设计及食物牌，免去大量重新搞的麻烦也。
　　
总之，你唔做？佢即接！