【曾智华专栏】骑师最怕货比货

终于有个似样的外援骑师嘞，马迷一定知我讲边个，正是纽西兰骑师戴文高。
　　
不怕不识货，最怕货比货。骑师一落跑道，表演几场，大家已知其斗志、天分、骑功、胆识⋯⋯
　　
快活谷跑道相当虾人，新来的，必定要一段时间才能适应其上山落山及急速掟弯，少啲平衡力都分分钟会大波勾也。
　　
小弟极少赛后翻睇巡逻影片，因输咗就输咗，喊都无谓也。
　　
但周三破例，因要重温戴文高如何策骑「天外惊天」，于直路如飞杀上，擒下看来必胜的「佳尊三」，眼前一亮也。
　　
之后再睇佢骑「中华英雄」，一步都冇放弃，博入第四。仲有，将排十档、看似冇乜机会的「勇眼光」力铲入Q，唔⋯⋯以第一次出赛快活谷的新仔而言，骑三场而交出如此表现，希斯果真独具慧眼！
　　
点解咁高手骑师，其他练马师一只马都冇提供畀佢呢？呢种唔识货现象，相信好快一百八十度倒转，因马圈乃跟红顶白的舞台也。
　　
翻睇戴文高骑三场全部搏命时，我又再睇埋香港骑师之王潘顿点处理同晚马匹。乜佢系「潘顿」咩？唔多似㖞，有几场入弯波勾，最后二百又施展「柔功门」。
　　
不过，今时今日以佢老哥地位，仲有边个监场及赛事董事会严厉地用Close Up，慢镜睇佢全程有冇决心吖，唔惊惊佢又扭计话拜拜咩。
　　
讲到过江龙，前雪梨冠军骑师艾道拿，至今仍只是一「过江虫」，跑咗三十一场，Q都冇条，名不副实，几时先可以Show Quali呀？
　　
明天小弟一于买「当头起」！全部戴文高坐骑买WP，投注140元，然后揸杯冰冻大生啤送陈皮花生，睇佢点样表演！七只中我最爱「快狠准」，希望冲线时马如其名！