【曾智华专栏】拒绝一亿．后台脚震

江湖规矩——冇免费宣传，唔该交功课！
　　
讲紧乜？正是有「Fit马」之称、精力经常过剩（日日马不停蹄四围飞，仍走去身水身汗拍电视）的马时亨，部署大半年的节目《马时亨．香港情》，终于面世，明晚九时四十五分在翡翠台首播。集集不同嘉宾，碌爆老友卡才完成，当然非常紧张，望开波就有好收视率。
　　
故此，与制作人萧潮顺度啊度，决定以「歌神」张学友做头炮，希望一雷天下响。
　　
咁当然要宣传度桥。除TVB不停出Promo外，更夸张，大家如今若日日搭港铁，都会见到Fit马摆出个英明神武款，晒出系列嘉宾名。
　　
喂喂，边个咁重锤落港铁广告？幕后人劲多「桥」，当然晨早部署。首先揾得港铁集团落水赞助，承诺集集包有港铁建设介绍，交换宣传，各取所需（不要忘记，马时亨是上任港铁主席，由佢Sell港铁，最Fit）！
　　
好啦，讲返文首第一句——唔该交功课。
　　
节目推出前，Fit马约齐所有传媒老友，希望预先力谷。小弟有分参与饭局，当然问：「马主席，单刀直入，唔该畀两个吸引重点！」
　　
一揿掣，佢立即交功课：「有有！第一集我同张文新一齐逼张学友，结果爆出两个从来冇人知的秘密！第一个，佢曾拒绝一项唔使唱歌的一亿人仔Offer！点解？睇节目啦！基于咁，终益晒另一个巨星，收五千万人仔即杀！点解佢会嫌钱腥？正正显示张学友的个人质素！」
　　
咦，呢个宣传点果然有料到噃！
　　
「另外讲多个吸引点。张学友在节目内，爆出一位公认『舞台王者』巨星，原来出台前，惊到脚震！系咪难以想像呢？学友点知？正因一齐排住等出场也！」
　　
《马时亨．香港情》，我预先睇晒第一集，真系得，一于推荐。