【曾智华专栏】有得震冇得瞓

上周三潘顿梦游马场一晚后，上周六立即扎醒，一郁手就𡁻三W六Q一P，真系任佢开！

点解咁劲？ 无他， 骑功超一班，好马任佢拣，有乜法子唔好似蟹咁——打横行？

本来马场乃英雄地，冇人想输者。但去到老潘境界，真系可以输赢随意，反正想做「英雄」随时得，你估似黄俊及黎海荣咩。　

马季步入尾段，开始有五位练马师有得震、冇得瞓，因分分钟收警告信。包括郑俊伟、何良、高伯新、徐雨石及苗礼德。郑及何最脚震，因两位已连续两季收信，若今季再收，有可能钉牌冇得玩。

马会呢个制度非常好，因任何行业要进步，必须汰弱留强，能者居之，不可婆婆妈妈。今季最难明为徐雨石，太过唔合逻辑地失常。上季仍有二十一W，虽只得十七W有效而被警告，但起码接近安全线。今季真系唔知搞边科，虽因成绩差有马流失，但旗下仍有三十八匹马（三十六匹可以出赛），点解惨到只得五W？好难交代啫。

另外，更离奇是苗礼德，大家可记得佢几巴闭？到港前两度成为南非冠军练马师。抵港一开仓，即凭「胜利名驹」赢打吡大赛，声名震天响。之后又训练出马王「雄心威龙」。点解今季好似食错药，搞到身水身汗仍只得四W？边个有答案？

至于来自法国的名牌练马师高伯新，也曾是「赢大赛如食生菜」的殿堂级人马。惨情，至今仍只得八W，若果冇短途马王「福逸」顶住，分分钟更大镬。

究竟高、徐、苗三厩发生乜事呢？我真系好想知答案！

今晚又有得玩！我会用吕健威弹畀契仔何泽尧的「勇敢巨星」、「百胜名驹」及「高明骏将」W三串七，再P三串四！