【曾智华专栏】莫雷拉变返「莫雷拉」

周三冠军骑师潘顿再表演「梦游马场」，骑八只，死咗两只全热，又瓜埋几只半热，成功完成「伏匿匿」！其实马会操盘手早已预告，因「骑师王」开飞四点二五倍，当然冇咁大只蛤乸。咁点解仲有两只全热？有大量马迷一厢情愿囉。
　　
讲到骑师，近日与马迷老友饭局主题，并非香港马事，而是澳洲马事。
　　
点解？因上周澳洲大赛，赫然发现香港前N届冠军骑师莫雷拉上阵。咦⋯⋯乜佢唔系话周身难以回转伤势，要挂靴嘅咩？更奇，直播中的莫雷拉，变返十年前的「莫雷拉」！即系点？即系完全恢复「艺术性骑功」，只只马在佢胯下「享受赛事」，轻轻推送，已一只又一只前列而返。
　　
肉眼所见，丁点不见呢位恢复「雷神」状态的骑师，有任何体能问题，更看不见离港前几年笑唔出、心事重重的表情。
　　
拉过几位马会「幕后人士」及高层问何解会如此？乜莫雷拉唔系伤到要决定挂靴的吗？
　　
个个眼神古古怪怪地笑，死都唔讲原因，恍似顶级机密。
　　
嗱嗱，咁就难怪谣言满天飞嘞！有冇人能够挺身而出，将事实及真相用理据铺陈，还呢位殿堂级艺术家骑师一个「清白」呢？
　　
最好，当然佢能以上周的体能状态及拼劲，再次在香港马场「复活」啦。阿门！
　　
讲返今日沙田赛马，相信潘顿会「瞓醒」嘞，因成手恶马兼「夫卜」。其中蔡神仙只「金驰」，上次大超班姿态弹离胜出，夸张到终点前收缰，加九分，应有排赢！但肯定大热。
　　
此场必须留意上次眼前一亮新马「欧洲传奇」及「凯旋时光」，天生斗心非比寻常。另加一匹从未上阵，但潘顿试闸一枝箭咁领放的「纵横万里」。呢场穿匀四只啦！