【曾智华专栏】加州梦Vs.加州白果

放长假，走咗N咁多人，好鬼宁静，呢种感觉，在香港乃相当高享受。
　　
小弟绝不会呢段日子外游，因机场逼爆、机票食宿乜都贵外，更会失去慢慢叹「宁静香港」的黄金机会。
　　
留港Hea几日，睇吓串流平台，买啲好鱼靓肉返屋企慢慢撚，然后，再度吓马仔，真疏乎。
　　
明日沙田两场二级赛，短途锦标当然睇「金钻贵人」单骑表演「执钱大法」。马主郑氏家族，羡慕死班跑极冇得赢的马主，同是付出七万、八万元一个月养马，一个天堂，一个地堂。
　　
另一场主席锦标则必好睇。成个局，乃「蔡氏宗亲会」血战告东尼，因蔡氏四只上阵，蔡约翰出「夏威夷」及「健康快驹」，罗富全出「发财先锋」及「健康愉快」。当中「健康快驹」及「发财先锋」评分未尽，绝对有力与告仔战马一撼。
　　
告东尼出明星马「加州星球」，睇赛绩当然冇得顶，三季出战十六次，九W六Q一第三。不过，有两大疑点，此马刚刚两场只能入位置兼评磅员一分不加，即系点？即系似乎已到顶峰，尽尽哋嘞。加上上场要力斗「金钻贵人」，用咗唔少力。斗输，打击英雄感及耗去不少体能。故此若呢场成顶头大热，可以悭返，反正只是二级赛，不如保留里程稍后再博。
　　
若如是，应畀厩侣、今季仍未W出的「美丽同享」去马。上次潘顿骑，输畀佢老友贺贤的「北极光」，有少少「唔多似真」。
　　
综合分析，呢场应买四只「健康快驹」、「发财先锋」、「美丽同享」及「加州星球」二重彩复式。总之唔要「加州星球」W，悭返可也。
　　
明日告仔出几只「加州」，好似想大唱《California Dreaming》。加州梦，乃我辈年轻一代日日都发住的。不过，梦醒后，返回现实，分分钟会变「加州白果」。